សិក្ខាសាលាគ្រូមត្តេយ្យភូមិភាគកំពង់ចាមឆ្នាំនេះយកចិត្តទុកដាក់អំពីកុមារអូទីស្សឹម និងយុត្តិសាស្រ្តក្នុងការបង្រៀនកុមារ

#ខេត្តកំពង់ចាម

គណៈកម្មការសហព័ន្ធគ្រូមត្តេយ្យភូមិភាគកំពង់ចាមបានរៀបកម្មវិធីសិក្ខាសម្រាប់អ្នកគ្រូមត្តេយ្យមួយក្រុមតូច និងតាមប្រព័ន្ឋស្សូម(zoom)ក្រោមប្រធានបទ”ការផ្សព្វផ្សាយការអនុវត្តកម្មវិធី សិក្សាកុមារអូទីស្សឹម និងយុត្តិសាស្រ្តក្នុងការបង្រៀន រយៈពេលពីរថ្ងៃចាប់ពីថ្ងៃ២១-២២ ខែកញ្គា ឆ្នាំ២០២១ នៅព្រះវិហារកំពង់ចាមក្រុង ស្ថិននៅក្នុងភូមិ១ សង្កាត់វាលវង់ ក្រុងកំពង់ចាម ក្រោមអធិបតីភាពលោកប៊្រុយណូ កូសម៍ អភិបាលព្រះសហគមន៍កាតូលិកភូមិភាគកំពង់ចា។

បងស្រីក្លារ៉ាពេន ហ៊ីល ជាអ្នកសម្របសម្រួលកម្មវិធីសិក្ខាសាលានេះបានឲ្យដឹងថា៖”ដោយសារតែបញ្ហាជម្ងឺកូវីដ-១៩ ចឹងយើងមិនអាចជួបជុំគ្នាច្រើនបានទេគឺមានតែអ្នកគ្រូមួយចំនួនតូចគឺ ចំនួន៦នាក់តែប៉ុណ្ណោះ ហើយមួយចំនួនទៀតគឺយើងចូលរួមជាមួយគ្នាតាមរយៈប្រព័ន្ឋZoom”។

បងស្រីបន្តថា៖”មូលហេតុដែលលើកយកអំពីកុមារអូទីស្សឹម និងយុត្តិសាស្រ្តក្នុងការបង្រៀនជាគោលធំគឺព្រះសហគមន៍មានគោលបំណងចង់ស្វែងយល់អំពីស្ថានភាព និងអាការៈផ្សេងៗរបស់កុមារអូទីស្សឹម ដើម្បីងាយដឹងអំពីកុមារដែលមានបញ្ហានេះ(អូទីស្សឹម)ថាតើត្រូវជួយគេបានដោយរបៀបណាជាពិសេសកុមារនៅតាមជនបទ មិនសូវទទួលបានការមើលថែពីឪពុកម្តាយ”។

លើសពីនេះបងស្រីពេនហ៊ីលបន្ថែមថា៖”ភាពជាអ្នកគ្រូមត្តេយ្យគឺត្រូវស្វែងយល់យ៉ាងច្បាស់អំពីជម្រៅចិត្ត និងវិធីសាស្រ្តក្នុងការបង្ហាត់បង្រៀនដល់កុមារតូចៗតាមកម្រិតរបស់គេ ហេតុនេះ ព្រះសហគមន៍កាតូលិកភូមិភាគកំពង់ចាមខិតខំយកចិត្តទុកដាក់ពង្រឹងប្រព័ន្ឋអប់រំកុមារតាមមូលដ្ឋាន និងតាមសហគមន៍នានា ទៅលើគ្រូដើម្បីឲ្យមានកោរុកោសល្យច្បាស់លាស់ ជាពិសេសតាមកម្មវិធីសិក្សារបស់រដ្ឋជាដើម ដោយមានវគ្គសិក្ខាលាសានានាដោយមានការបង្ហាត់បង្រៀនផ្ទាល់ពីសំណាក់គ្រូមកពីក្រសួងអប់រំថ្នាក់ខេត្ត និងគ្រួដែលមានបទពិសោធន៍ និងឯកទេសច្បាស់លាស់មកពីបណ្តារាជធានី និងខេត្តមួយចំនួន”។

កម្មវិធីសិក្ខាសាលាគ្រូមត្តេយ្យនេះគឺមានការចូលរូមចែករំលែកពីសំណាក់អ្នកស្រីភោគ ម៉ានី ទទួលខុសត្រូវសាលាអប់រំពិសេសសម្រាប់ការលូតលាស់(សម្រាប់កុមារអូទីស្សឹម)នៅព្រះវិហារព្រះកុមារយេស៊ូបឹងទំពុន ក្រុងភ្នំពេញ និងបងស្រីនៃសាលាមត្តេយ្យដុនបូស្គូទឹកថ្លា ក្រុងភ្នំពេញ និងសហការី ពន្យល់ណែនាំអំពីបច្ចេកទេសនៃការប្រៀន ការរបៀបចំផែនការបង្រៀនរយៈពេលពេញមួយឆ្នាំ និងការអនុវត្តជាក់ស្តែងពេលបង្រៀន-ល-។